Уште Еден Блог

Wifi мрежи во Скопје

Tue, 03 Mar 2009 00:06:00 +0100

Благодарение на Стама кој ми позајми NaviLink Bluetooth GPS, бидејќи мојот USB неможеше да види доволно сателити си ја испробав желбата за мапирање на wifi мрежите во Скопје.

Значи на убунтуво инсталирав kismet и gpsd и се повозев низ центар на Скопје. Од суровите податоци што ги дава kismet со малава пајтон скрипта изгенерирав .json фајл од кој што оваа страница ги чита локациите на вифи мрежите кои kismet ги видел. Од некаде најдов како на Гугл мапата да цртам круг со центар и точка од кружницата. Како центар ги зимам координатите каде кисмет најсилно ја видел мрежата, а за радиус точката каде најслабо ја видел вифи мрежата.

Воопшто не е комплицирано и ако некој има GPS адаптер и сака да проба може да намине на Сподели знаење да пробаме заедно. Единствено нешто што приметив и поради што се откажав да го извозам цело Скопје е што местоположбата на вифи мрежите кога возиш со кола низ Скопје е по улиците што не е точно и за поточни податоците треба пешки да се шета.

Значи пак линкот со вифи мрежи во центарот на Скопје кај грчка амбасада.

Ново регистрирани .мк домени

Tue, 13 Jan 2009 21:06:00 +0100

По идеја на Дамјан еве мал сајт кој ги кажува ново регистрираните .мк домени денеска.

Значи сајтот domejn.ot.mk ги листа денешните регистрирани домени во Марнет, плус прикажува гратис графици со историски податоци колку домени се регистрирани по датум и по тип. Нормално има RSS канал.

Користам python, beautifulsoup и pygooglechart, еве ги скриптите

РСС канали за time.mk

Sat, 13 Dec 2008 11:24:00 +0100

time.mk е интересен сајт кој ги собира вестите од мејнстрим интернет медиумите во Македонија и автоматски ги групира. За жал Time.mk сеуште немаат рсс канали за да може да се стават во Google Reader или како што јас сакам да ги користам со активни обележувачи во Фајрфокс.

Затоа направив мало сајтче кое ги собира вестите од time.mk и генерира рсс канали. Најмалку јас ќе си ги користам, со надеж дека и некому друг ќе му користат додека time.mk не направат свои.

Значи на сајтов timemk2rss.ot.mk има рсс канали генерирани од содржината на time.mk.

Анализа на .мк домени и веб сервери поврзани со нив

Mon, 27 Oct 2008 20:49:00 +0100

Од јавно достапните податоци на Марнет и неколку сприптички за проверка на днс/веб серверите направив анализа на регистираните .мк домени.

Анализата содржи колку има регистрирани .мк домени според Марнет, како се зголемувал бројот на регистрирани домени, колку од нив се активни (имаат правилно поставени днс сервери), кои регистранти имаа мајмногу домени, кои сопственици на днс сервери опслужуваат најмногу .мк домени, кои главни домени имаат веб страна, кои веб сервери се користат да ги сервираат веб страните и сл.

На кратко има регистрирано 12773 домени од нив 11073 се активни. 54% од нивните главни веб страници ги опслужува некоја верзија на Microsoft IIS 40% некоја верзија на Apache

Може да го погледнете документот со анализата на регистрирани .мк домени во пдф, или оригиналната OpenOffice верзија..

Дел од скриптите со кои ја правев анализава ги има исто тука.

п.с. 2006 година УСАИД и Метаморфозис направиле слична анализа. Можда требаше да направам гугл срч пред да ја правам за да направам споредба со тие податоци, ама ај друг пат.

Дали е Велигден?

Thu, 18 Sep 2008 14:32:00 +0200

Малку си поиграв и еве еден обид да помогнам на учениците од основните училишта кои оваа година почнаа да учат веронаука. Направив мало сајтче кои ќе им каже дали денеска е или не е Велигден.

http://www.dalieveligden.mk. Има и rss канал на кој може да се претплатиш и секој ден да бидеш известен дали денеска е Велигден или не.

Не дека е нешто ново: http://www.isitchristmas.com/, hasthelargehadroncolliderdestroyedtheworldyet.com/, http://isittuesday.com/

Jabber/Gtalk бот речници од македонските интернет речници

Tue, 16 Sep 2008 17:48:00 +0200

По идеја на Александар направив jabber/gtalk ботови кои на внесен збор пробуваат да му најдат превод од онлајн речниците rechnik.on.net.mk или recnik.365.com.mk и да го вратат на тој што прашал. Интересни се за мобилни jabber IM клиенти.

Еве е листата на ботови кои може да ги додадете како контакти во вашите jabber клиенти (може да се додадат и во Google Chat/Gtalk). Да им прозборите збор по збор и да почекате да ви вратат одговор. Ако го враќаат истиот збор значи не нашле превод.

Бот	Јазици
mk2en@jabber.org	Македонски - Англиски
en2mk@jabber.org	Англиски - Македонски
mk2al@jabber.org	Македонски - Албански
al2mk@jabber.org	Албански - Македонски
mk2gr@jabber.org	Македонски - Грчки
gr2mk@jabber.org	Грчки - Македонски
mk2de@jabber.org	Македонски - Германски
de2mk@jabber.org	Германски - Македонски
mk2sl@jabber.org	Македонски - Словенечки
sl2mk@jabber.org	Словенечки - Македонски

Можни се неколку подобрувања како на пример да бара прво во едниот па во другиот, на внесесни повеќе зборови/реченица да пробува да ги преведе еден по еден и сл. Затоа еве ја архивата со ботовите jabberrechnici.tar.gz па ако некој сака да ги имплементира тие работи и да дигне свои ботови/или да ми ги даде да ги пуштам јас/ слободно може. :-)

Инаку Google се разбира има подобри речници(т.е. преведувачи) на други јазици.

Bluetooth сервис за добредојде во канцеларија

Sat, 02 Aug 2008 18:10:00 +0200

Во Рамстор и пред Бисер имало демек bluetooh зона и на сите мобилни во близина им праќало разни сликички.

Направив мало python програмче за на работа кое го прави истото, па може на некој ќе му користи. Плус ќе биде интересно да добијам повратни информации како функционира со разни модели на мобилни. Му треба компјутер со Linux и bluetooth адаптер. Linux може да се најде било каде, а во Анхоч има донгле за 350 денари што си работи супер.

Значи, работи континуирано и на сите bluetooth уреди во близина кои ги гледа првпат им праќа контакт информации (vcard.vcf). Секој следен пат кога ќе види ист уред му праќа некоја случајна сликичка за позадина.

Во архивата има procitaj.txt со информации кои библиотеки му требаат и како работи.

Архивата: bluetooth_dobredojde.tar.gz. Околу 300 слики од zedge.com: sliki_zedge_com.tar.gz

Дирекција за заштита на лични податоци

Wed, 27 Feb 2008 19:45:00 +0100

Сакав да се информирам кои ми се правата ако во некоја државна институција не ме пуштат да влезам ако одбијам да дадам лична карта или мобилен телефон да ми ги „чува“ портирот додека не излезам, пошто во последно време нон-стоп има информации од Дирекцијата што не учат на нашите права, што ми се допаѓа.

Отидов на сајтот на Дирекција за заштита на лични податоци и око ми фати линкот „Заштита на приватност“.

Почнав да го читам и си реков види баш убаво напишан текст и почна да ми влева доверба дека знаат што прават. Стигнав до претпоследниот пасус:

Сепак, податоците на наште сервери не се чуваат подолго од ??? дена.

Прашалниците и печатната грешка се нивни, не мои. Се насмеав, и си реков тој што го пишувал забравил да праша колку време се чуваат па ај си викам ништо страшно.Продолжив да го читам последниот пасус за колачиња кои страната на Дирекцијата ги праќа и ги чита од мојот прелистувач.

На страната на Дирекцијата има само таков тип на "Cookies"
што исчезнуваат по исклучувањето на интернет пребарувачот, 
за разлика од оние кои остануваат снимени на вашиот компјутер 
со години, па и децении.

Еј топ! Баш културно од нивна страна што ми праќаат колачиња што истекуваат на крај на сесија и што не ги чуваат со децениии како оние лошите сајтови.

Брз хак на planet.softver.org.mk

Mon, 30 Apr 2007 15:46:00 +0200

Постов е за тие што ја читаат планетава преку РСС да приметат дека има нова работа. :)

Брз javascript хак кој овозможува за тие што ја следат планетата во прелистувач да можат да одберат кои автори ќе ги читаат. Лево од имињата на жителите има минус кој кога ќе се кликне ќе ги тргне статиите од тој автор за оваа и сите следни посети.

За жал начинот на кој што работи PlanetPlanet, софтверот зад нашава Планета, е малку ограничувачки за пофино одбирање кои автори ќе ги следи секој посетител и преку RSS. PlanetPlanet на одреден период ги чита фидовите на сите жители и формира статички html и rss страници па барем јас немам идеја како тоа лесно и брзо да се реши. Ако никој нема сега идеја(читај готов patch) како тоа да се направи, ќe бараме начин кога ќе имаме ептен, ептен многу жители. :)

Записничарот на #lugola

Mon, 23 Apr 2007 16:56:00 +0200

Еве го на интернет записничарот за ирц каналот #lugola (на irc.freenode.org) -> irclogger.softver.org.mk, благодарение на Дамјан и Уфо како и за Кајмакот.

Софтверот е изменета верзија на irclogger кој води записник за #django и записничарот на #razmjenavjestina.

Изворниот код на оваа верзија, ако некој има желба, се вика „Записничарот“.

Сподели знаење 11 - GRUB splashimages

Tue, 17 Apr 2007 22:56:00 +0200

Еве за тие што беа на Сподели знаeње 11, ги стаив груб сликите (3MB). Има некаде 90 слики, повеќете се од интернет што сум ги собирал а има некои јас што сум ги правeл.

Таму се и скриптите во bash и python кои би ја менувале при секое бутирање сликата на Груб. Има и коментари во нив што кое прави.

Кајмакот - додаток за Фајрфокс за пријавување статии.

Sat, 07 Apr 2007 18:35:00 +0200

Направив додаток за Фајрфокс за да може полесно да се пријавуваат статии на Кајмакот.

Еве кој сака може да го инсталира.

Кога ќе се инсталира се овозможува кратенката ALT+K која носи директно на врската за пријавување статии со веќе внесена адреса на статијата. За тие што не користат кратенки има и ставка во Алатки(Tools) менито, во менито на десен клик и во Алатникот(Toolbar)

Работи сигурно на Firefox 2.0.0.3 (linux, windows, mk, en) и на 1.5.0.9 (windows en). Ако примети некој дека не работи знаете како да ме најдете. :)

Исто пред некој ден по сугестија на Миша направив и копчиња кои можат авторите на вебсајтови да ги стават кај себе. Покрај Миша кој ги стави дугмињата со број на гласови, Гудбајтс и Гоце направија врски со сликичка за директно објавување на нивните блогозаписи. Супер! :)

Кајмакот - популарни македонски статии.

Tue, 03 Apr 2007 12:27:00 +0200

Пред некоја недела учев веб програмирање со Џанго(Django) па земав да правам web 2.0 сајтче како Digg, Krtica.ba за пријавување, гласање, споделување и популаризирање на интересни интернет статии.

Па ете го поставено на интернет и се вика Кајмакот (кајмакот испливува на површина на млекото - како што е идејата да испливуваат популарните статии).

Регистрирањето е брзо и едноставно па можете да се регистрирате за да пријавувате интересни статии и да гласате за веќе пријавените за да дојдат до израз. Идејата ми е да се пријавуваат и популаризираат македонски содржини, но во крајна линија тоа ќе биде на корисниците да одлучат кои статии ќе ги пријавуваат и за кои ќе гласаат да искочат на главната страница.

Се разбира критики, забелешки и идеи се добредојдени!

Хармониски осцилации.

Wed, 31 Jan 2007 11:25:00 +0100

Криво ми е само што, иако мислам дека сум барем малку инжињерски тип, повеќе ми се свиѓа објаснувањето за „обичните“ луѓе. :)

1. За инжињери.

2. За сите останати.

investinmacedonia.com? Лицемерие.

Fri, 26 Jan 2007 21:45:00 +0100

Воопшто не ми е јасно зашто веб страната на кампањава „Invest in Macedonia“ има странски домејн и е хостирана во странство?

Зарем нема доволно хостинг компании во Македонија, или не се квалитетни?

Како владата ќе убеди некој странец да инвестира во Македонија како земја со квалитен ИТ сектор кога таа самата нема довербата за хостирање на домејнот и сајтот?

Плус домејнот е регистриран лично на директорот на Агенцијата за странски инвестиции, а не на име на Агенцијата што исто ми е спорно но на тоа може да му прогледам низ прсти пошто ајде не е ИТ прашање.

Информациите за домејнот на whois.net и за хостинг серверот на ripe.net.